Tað kom týðiliga fram á rættarfundinum í dag, at deyði maðurin hevði tvey sár í bringuni, og tað kann skapa trupulleikar fyri verjuna.
Ákærdi greiddi í rættinum í dag frá, at hann sá bara knívin, tá órættaði langaði út eftir honum við knívinum.
Síðani sá hann ikki knívin aftur, fyrr hann fyri aðru ferð fór upp í íbúðina hjá órættaða. Tá lá deyði maðurin á rygginum og hevði knívin í vinstru hond.
Tað merkir, at minnist ákærdi rætt, hevur órættaði skift knívin úr høgru yvir í vinstru hond.
Undir vitnisavhoyringini segði ákærdi, at órættaði fall bert eina ferð, og tí kundi hann ikki siga nakað um, hví hann hevði fingið knívin tvær ferðir í bringuna.
Annað sárið var 7,5 sentimetrar djúpt, meðan hitt var 3,4 sentimetrar djúpt.
Hvat hetta kann fáa at týða fyri sakina er ikki gott at vita, men í morgin skulu rættarmedisinskir serfrøðingar avhoyrast, og tað er møguligt, at teir kunnu varoa meira ljós á málið.
