Nú bara fáir dystir eru eftir í Atlantic Airways-kappingini, er framvegis ein ósvaraður spurningur: Verður tað KÍF ella H71, sum skal møta Neistanum í FM-finaluni?
Framvegis er KÍF í einari lyklastøðu, tí liðið bara skal tryggja sær eitt stig aftrat í trimum teimum síðstu dystunum fyri at koma í finaluna. Sunnudagin spælir KÍF á heimavølli enntá ímóti H71, og tá er tað ein sannroynd, at vinnur KÍF, er liðið í FM-finaluni.
Hendir hinvegin tað, at hoyvíkingar vinna, eru teir bara tvey stig aftan fyri KÍF, sum tó hevur ein dyst meira eftir at spæla. Fær KÍF stig í øðrum av teimum báðum dystunum, sum eru úti ímóti Kyndli og StÍF, er KÍF í finaluni. Fær KÍF hinvegin einki stig burturúr, samstundis sum H71 vinnur sín síðsta dyst, sum er ímóti VÍF, er H71 í finaluni.
Tveir aðrir dystir eru hjá monnunum um vikuskiftið, og tann fyrr er longu í kvøld, tá botnuppgerð verður í Badmintonhøllini í Klaksvík, har Team Klaksvík tekur ímóti StÍF. Úrslitið flytur einki, tí Team Klaksvík verður verandi niðast og StÍF næstniðast. Og gestirnir eru annars stórfavorittar.
Triði dysturin er sunnudagin í Vestmanna, tá VÍF og Kyndil møtast í tí, sum verður roknað sum tann stóri klassikarin í manshondbóltinum. Kortini er lítil klassikaradámur yvir uppgerðini hesa ferð, tí bæði VÍF og Kyndil eru úti av FM-kappingini, so hetta er í mesta lagi ein dystur um fjórða plássið.
