Tað var Kári Johannesen í Runavík, sum fekk fulla plátu og slapp at snara gekka-hjólinum í kvøld. Hann segði, at hann bara einaferð áður hevur vunnið í gekka-spælinum, og tað eru fleiri ár síðan.
Høvuðsvinningurin var á 200.000 krónur, og Kári helt fyri, at frægasti kjansurin er at deila upphæddina í trý. Soleiðis vóru 70.000 krónur í hvørjum leypi, tá hann slapp at snara hjólinum.
Í fyrstu royndini steðgaði hjólið á 10.000 krónum, men her helt maðurin úr Runavík - so sjálvsagt - at hann fór at royna einaferð aftrat.
Í aðru royndini gekk betur, og hesaferð steðgaði hjólið á 20.000 krónum. Kári Johannesen helt fyri, at tað er so sjáldan, at møguleikin at snara hjólinum býðst, og tí fór hann eisini at brúka seinasta møguleikan.
Í triðju og seinastu royndini steðgaði hjólið - júst sum í fyrstu royndini - á 10.000 krónum, sum eisini gjørdist vinningurin hjá Kára Johannesen í kvøld.
- Hatta var tað. So hevur man roynt hetta, helt hann blídliga fyri - og í hinum endanum helt verturin, Magnus Magnussen, at hesar 10.000 krónurnar í minsta lagi kunnu brúkast til at keypa jólagávur fyri.
##med2##