Karl Løkin skiftir úr ÍF til danska felagið Næstved BK, sum spælir í triðbestu donsku deildini, 2. division vest. Hesum boðar danska felagið frá á heimasíðu sínari.

Tað er fyrrverandi málmansvenjarin á føroyska landsliðnum, Mogens Krogh, sum hevur fingið samstarvið í lag. Hann er nú venjari hjá Næstved BK, og hann er væl nøgdur við at hava fingið Karl í hópin.

- Karl er eftir mínum tykki ein ótrúliga spennandi verjukendur miðvallari. Hann arbeiðir hart, men hevur samstundis góðan bóltførleika og eitt gott skot, sigur Mogens Krogh við heimasíðuna.

23 ára gamli Karl Løkin hevur í ár hevur spælt 16 dystir við ÍF og skotið fýra mál.

Sáttmálin ímillum hann og Næstved BK er galdandi í trý ár.