Í dag er fyrsti heystardagur, og við heystinum gerast dagarnir styttri og myrkari. Tá er umráðandi hjá børnum at vera í endurskini, soleiðis at tey eru sjónlig í ferðsluni bæði í skýming og myrkri. Ráðið fyri Ferðslutrygd mælir øllum til at seta endurskin á jakkar, taskur, barnavognar og gjarna fleiri á hvønn persón. Eisini vaksin eiga at nýta endurskin, sigur Ráðið fyri Ferðslutrygd.
Í løtuni verða hjálmar og vestar pakkaðir og sendir skúlunum kring landið. Hetta arbeiðið verður gjørt í samstarvi við Verkstaðið Vón. Væntandi hava allir skúlar móttikið endurskinsvestarnar til 1. flokk og súkkluhjálmar til 2. flokk fyrst í september.
Súkkluhjálmarnir verða latnir børnum í samstarvi við Trygd og Tryggingarfelagið Føroyar, meðan endurskinsvestarnir verða latnir í samstarvi við Tryggingarfelagið Føroyar.
Í gjár vóru tað børn í Kvívíkar skúla, sum fingu vestar og hjálmar, og tað var nýggi stjórin á RFF, Brynhild Høgnadóttir, ið býtti út til børnini.
