Tveir føroyskir landsliðsleikarar vóru í eldinum í bestu donsku hondbóltsdeildini hjá kvinnum í kvøld.
Pernille Brandenborg og liðfelagarnir í Keypmannahavn vunnu á útivølli stórsigur 37-25 á Horsens. Í steðginum var Keypmannahavn bert á odda 16-15, men í seinna hálvleiki var Keypmannahavn greitt omaná.
Pernille skoraði tvey mál.
Keypmannahavn er nummar sjey í deildini við 10 stigum.
Landsliðsmálverjin, Rakul Wardum og liðfelagarnir í Ringkøbing taptu stórt 24-37 fyri toppliðnum, Odense. Í steðginum var alt mest sum avgjørt. Tá var støðan 20-10 til Odense.
Rakul bjargaði fimm av 31 málroyndum. Kappingarneytin, Emma Friberg bjargaði einari av 11 málroyndum.
Ringkøbing er nummar tíggju í deildini við níggju stigum.
