Málmunurin í 14 dystum er 59 – 4. Tað sigur, at KÍ av álvara hevur undanvind. Í dag vann KÍ í fínum summarveðri 4-0 á heimavølli ímóti ÍF. Hetta var sjeyndi sigurin á rað, og í hesum sjey dystunum er samantaldi málmunurin 37 – 0.
Boris Dosljak var í fyrstu umførunum millum teir fyrstu ellivu. Tað hevur hann ikki verið seinastu ferðirnar. Í dag var hann aftur millum teir fyrstu ellivu, og tað takkaði hann fyri við at skora tvey tey fyrstu málini.
Tveir minuttir undan steðginum og eftir horna úr vinstru og aftur og fram og so kontra frá Heina Vatnsdal stakk bólturin til Boris Dosljak, sum úr spískum í vinstru setti bóltin í handara síðunetið.
Og stórt korter eftir steðgin var Boris aftur upp á spæl, tá ið hann við høvdinum og úr vinstru stýrdi bóltin í handara síðunetið eftir innlegg úr høgru frá Árna Frederiksberg.
20 minuttir undan leikloki varð 3-0. Jákup B. Andreasen átti innleggið úr vinstru, og mitt fyri málinum tamdi Bob Sumareh bóltin, áðrenn hann fluktaði bóltin upp í nettakið. Hetta var tíggjunda málið hjá Bob Sumareh, sum nú er toppskjútti hjá klaksvíkingum.
Innskifti Jesper Brinck átti innleggið úr høgru, tá ið framrættaði miðvallarin Claes Philip Kronberg sjey minuttir undan steðginum staðfesti 4-0 sigurin.
Fuglfirðingar tóktust ikki vera heilt misnøgdir við uppgerðina, sum tað ivaleyst vóru fleiri, ið stúrdu fyri, nú teir saknaðu fleiri av lyklaspælarunum, og mótstøðuliðið var suverena toppliðið. Síðstu løtuna vóru tveir blaðungir fuglfirðingar fyri fyrstu ferð á besta liðnum. Annar var 16 ára gamli Jóhann J. Højbro, og hin var 16 ára gamli Markus á Lakjuni.
-Vit megnaðu væl í fyrra hálvleiki at varðveita skipað verjuspæl. Tíverri eydnaðist tað teimum eftir horna at fáa hol á, tá ið tað restaðu tveir minuttir av fyrra hálvleiki. Vit vóru vónbrotnir, og í steðginum savnaðu vit okkum. Teir trýstu okkum nógv, og teir skoraðu trý mál aftrat, men yvirhøvur eru vit nøgdir við hugburðin og avrikið, sigur vongverjin í vinstru hjá ÍF Ólavur Niclasen.
KÍ miðvallarin og liðformaðurin Jákup B. Andreasen er nøgdur við úrslitið, men hann er ikki nøgdur við avrikið hjá KÍ fyrstu stóru løtuna av fyrra hálvleiki.
-ÍF eigur stórt rós fyri, at tað eydnaðist fuglfirðingum at rigga so væl fyrstu stóru løtuna, eisini tá ið havt verður í huga, at talan var um lið, sum saknaði fleiri av profilunum. Í fótbólti gongur tað ikki altíð, sum tú ætlar. Tá ræður um at vísa rætta hugburðin og at arbeiða seg úr støðuni, sum tú ert misnøgdur við. Tað gjørdu vit, og eg eri fegin um, at tað eydnaðist undan steðginum at fáa hol á. Og í seinna hálvleiki riggaði spælið væl betur, enn tað gjørdi í fyrra hálvleiki. Tá spældu vit okkum til fleiri møguleikar, og tá skoraðu vit trý mál og vunnu tryggan sigur, sigur Jákup B. Andreasen.
KÍ – ÍF 4-0 (1-0)
1-0: Boris Dosljak 43.
2-0: Boris Dosljak 62.
3-0: Bob Sumareh 70.
4-0: Claes Philip Kronberg 82.
Dómari: Bjarki Danielsen
KÍ: Mathias Brinch Rosenørn – Jóannes K. Danielsen, Odmar Færø, Heini Vatnsdal (Børge Petersen, 73.), Lars Daniel Bjørkman – Árni Frederiksberg, Deni Pavlovic (Ivar Sollie Rønning, 40.), Jákup B. Andreasen, Boris Dosljak – Claes Philip Kronberg, Bob Sumareh (Jesper Brinck, 77.)
Gult kort: eingin
Venjari: Mikkjal K. Thomassen
ÍF: Martin Danielsen – Elias J. Lervig, Tóri Nolsøe Olsen, Steinbjørn Olsen, Ólavur Niclasen – Pól Jákup Lundsbjerg (Gunnar Christiansen, 69.), Emil Weihe Joensen, Ari Ó. Ellingsgaard (Jóhann J. Højbro, 80.), Hans Jákup J. Lervig (Markus á Lakjuni, 91.) – Gundur E. Petersen, Filip Djordjevic
Gult kort: eingin
Venjari: Ólavur Larsen
KÍ | 14 | 13 | 1 | 0 | 59 | 4 | 40 |
Víkingur | 13 | 8 | 4 | 1 | 30 | 12 | 28 |
HB | 13 | 8 | 3 | 2 | 37 | 9 | 27 |
NSÍ | 14 | 7 | 4 | 4 | 26 | 20 | 24 |
B36 | 13 | 6 | 5 | 2 | 26 | 14 | 23 |
EB/Streymur | 13 | 3 | 3 | 7 | 12 | 24 | 12 |
ÍF | 13 | 3 | 2 | 8 | 15 | 37 | 11 |
07 Vestur | 13 | 3 | 2 | 8 | 15 | 43 | 11 |
B68 | 13 | 1 | 3 | 9 | 16 | 39 | 6 |
TB | 13 | 0 | 2 | 11 | 6 | 40 | 2 |
15. umfar
Fríggjadagin 25. juni
ÍF – Víkingur
B36 – KÍ
Leygardagin 26. juni
07 Vestur – NSÍ
TB – EB/Streymur
Týsdagin 29. juni
B68 - HB