Kjak á Rás2 um muslimar í Evropa

Eftir eitt arabiskt vár kemur  eitt islamskt summar!

Tað heldur Óli Breckmann, sum skipar fyri kjakið á Rás2 klokkan 16 í dag.

Evnið í kjakinum í dag eru muslimskir tilflytarar í Evropa og, hvørjar ætlanir teir hava við sínum nýggja heimlandi.

Teir, sum fara at kjakast um evni, eru Gunnar Isfeld, cand. mag í søgu og átrúnað, og Jóannes K. Eliasen, cand. scient. og íðin islameygleiðari.

Óli Breckmann sigur, at hesa síðstu mánaðirnar, er nógv hent í Miðeystri og á øðrum islamskum "hermótum".

Eitt er, at stríðið í Gaza og drápini í Sýria halda fram.

Og ikki minst hevur rørslan ISIS, hertikið eitt økið í Sýria, Jordan og Irak, sum er líka stórt sum Bretland, og har teir eru farnir ógvuliga harðliga fram.

Samstundis flýggja nógvir muslimar heimanífrá úr Miðeystri til Vesturheimin og bara í fjør tók Svøríki ímóti 70.000 traumatiseraðum flóttafólki úr Sýria.
 
Í dag búgva einar 50 milliónir muslimar í Evropa og øðrum londum í vesturheiminum.

Men tað er eisini ein sannroynd, at nógv av teimum nokta at uppgeva sína trúgv og siðir í sínum nýggju heimlondum og ætla liva sambært trúnni. 

Og tað er hetta, teir báðir, Gunnar Isfeld og Jóannes K. Eliasen fara at skifta orð um á Rás2 klokkan 16 í dag.