Kjak á Rás2 um nógvar pengar

Landstýrið heldur fast um, at javnvág skal vera á fíggjarlógina í 2016. Men andstøðan, fjølmiðlar og búskaparfrøðingar ivast í, um hetta ber til við verandi fíggjargongd og fíggjarpolitikki.

Hetta er tað, sum Óli Brekmann fer at kjakast um í beinleiðis sending á Rás2 nú seinnapartin í dag klokkan 16.

Tey, sum fara at kjakast um spurningin, eru Bárður Nielsen, tingmaður fyri Sambandsflokkin, sum eisini er formaður í fíggjarnevndini, Kristina Háfoss, sum er framsøgufólk hjá Tjóðveldi í fíggjarmálum, og Janus Rein, sum er framsøgumaður hjá Fólkaflokkinum í skattamálum.

Í upplegginum til kjakið spyr Óli Breckmann um fiski- og alivinnan ”klára at oysa fleiri 100 hundrað milliónir krónur fleiri upp í landskassan og kommunukassar, enn politikarar verða trýstir, ella freistaðir, allastaðni frá, til at gjara út aftur"?

Landstýrið heldur fast um málið at fáa javnvág á fíggjarlógina í 2016, men andstøðan, fjølmiðlar og búskaparfrøðingar ivast í, um hetta ber til við verandi fíggjargongd og fíggjarpolitikki.

- Annars eru tað fá, sum mæla til sparsemi og varsemi, til hógv og afturhald í fíggjarpolitikkinum, sigur verturin.

- Andstøðan á tingi sigur seg kunna kroysta nógv fleiri milliónir burtur úr fiski- og alivinnuni og at gjara út við hægri pensjónum og veitingum.

- Áhugabólkarnir streingja á at skrúva útreiðsluventilarnar frá og at gjara út.

Men tey ivasomu hava kanska grein í sínum máli um, at javnvág um bert trý fíggjarár er høgt mál at seta sær.