Hondbóltur
Eftir at hava verið púrasta sørir fyrstu umførini av kappingini, hava kollfirðingar av álvara reist seg.
Seinasta sunnudag vunnu teir á VÍF, og í gjár koppaðu teir oddaliðnum úr Neistanum, tá hesir hitaðu upp til europiska uppgávu.
Tað var annars ikki so nógv, sum bendi á sensatiónina stóran part av dystinum. Hóast kollfirðingarnir hingu væl í mótstøðuni, so hevði Neistin støðugt munin, og etir megnaðu eisini at svara aftur, tá KÍF nakrar ferðir vann seg upp á javnt í seinna hálvleiki.
Men seinastu sjey minuttirnar gekk heilt galið. Frustratiónir og vantandi konsentratión bóru við sær,a t neyvleikin als ikki var til staðar hjá Neistanum seinastu løtuna, og ein væl spælandi Óla Christian Djurhuus mest sum læsti sítt mál fullkomuliga av.
Samstundis fekk KÍF veruliga ferð á sítt spæl, og við fimm málum á rað komu teir upp á 24-22. Neistin royndi at svara aftur, men tað eydnaðist ikki meira enn næstan, og so varð ringi dagurin staðfestur, tá teir í seinastu løtu misnýttu brotskast. Hetta kundi sum so bara minkað um munin, men talan var um fjórða misnýtta brotskastið á degnum, og tað sigur væl eisini nakað um takið, sum KÍF-málverjin hevði á bláu skjúttunum á degnum.
Fakta um dystin
KÍF-Neistin 25-23 (10-12)
10 min: 3-5
20 min: 5-9
40 min: 15-16
50 min: 18-20
Málskjúttar
KÍF: Rógvi Weihe 5, Ási Dam 5(4), Regin Petersen 4, Niklas Reginsson 3(1), Jákup Trygvason 3, Andrias Nielsen 2, Tony Weyhe 2, Bergur Lützen 1
Neistin: Jugoslav Djumic 5, Finnur Hansson 5(1), Heini Hanusarson 3, David Edvardsen 3, Sjúrður Thomassen 2, Bigir Poulsen 2, Áki Mørk 2, Karl Odmar Rasmussen 1
Brotskøst: KÍF 7, Neistin 5
Útvísingar: KÍF 5, Neistin 2
Dómarar: Rúni Mohr & Ragnar Simonsen
