Gamli Kommunuskúlin í Havn skal vera mentanarhús. Tað heldur Sóley Danielsen, sum lesur leiklist í London. Hon hevur nú tikið stig til at fáa listafólk at skriva undir eina áheitan á Tórshavnar Býráð um at gera Kommunuskúlan til eitt mentanarhús.
- Visjónin er, at fáa eitt skapandi og livandi umhvørvi í kommunuskúlanum, har hurðin er opin hvønn dag, og har allar listagreinar eru vælkomnar, skrivar hon.
- Møguleiki skal verða til at leiga sær venjingarrúm/arbeiðsrúm fyri ein bíligan prís, og at kunna nýta tey størru rúmini til konsertir, sjónleikir, gallarí, framsýningar, skeið og alt. sum hugflogið kann fevna um.
- Øll skulu kunna bíleggja sær tíð í hesum hølum, til sítt listarliga virksemi, og á tann hátt, at ríka um mentanarlívið í Føroyum.
Les meiri um innsavningina av undirskriftum við at trýsta HER
Hon vísir á, at enn hevur Tórshavnar kommuna ikki tikið støðu til, hvat bygningurin skal brúkast til - ella um hann skal rívast niður.
Endamálið við at savna inn undirskriftir, er at staðfesta, at tørvur er á einum húsi við hølum til venjing, hølum til at skapa list og hølum til at framføra og vísa list fram.
|
