Nú er ein serligur variantur av omikron farin at gera um seg í Danmark. Hetta er ein undir-variantur av omikron. Danska heilsustýrið sigur, at næstan helvtin av teimum, sum nú verða smittað við koronu, verð smittað av hesum nýggja variantinum av omikron.
Higartil hava tey funnið tríggjar undir-variantar av omikron, BA1, BA2 og BA3. Sum heild er tað BA1 varianturin, sum hevur gjørt um seg allastaðni hesa seinastu tíðina, men nú verða alsamt fleiri smittað við BA2 variantinum.
Um árskiftið vóru 20 prosent av teimum, sum fingu koronu, smittað við BA2 variantinum, men nú eru tað 45 prosent. Samstundis er talið fallið á teimum, sum verða smittað við BA1 variantinum. Danska heilsustýrið sigur, at gongdin er tann sama í Bretlandi, Noregi og Svøríki. Tey leggja afturat, at tað er stórur munur á BA1 og BA2 variantinum. ´
Heilsustýrið spurningurin er, hvussu hart hesin varianturin fer at raka, eitt nú, hvussu illa hann smittar, hvussu sjúk fólk verða og hvussu væl koppsetingin verjir fyri honum. Men enn vita tey ikki hvør munur er á BA1 og BA2 variantunum í so máta. Hetta eru spurningar, sum verða kannaðir. Men enn er tað ongar ábendingar um, at tað er nakar munur á, hvussu sjúk fólk verða, tí tað verða ikki fleiri av teimum, sum fáa BA2, sum vera innløgd enn tað verða av teimum, sum fáa BA1.
Samstundis verður eisini kannað, hvussu illa BA2 smittar og hvussu væl koppsetingin verjir ímóti hesum variantinum. Men í heilsustýrinum vænta tey, at koppsetingin eisini verjir væl ímóti BA2 variantinum.
