Í gjár vóru ódnartøk í Runavík. Hetta var síðsti liður í fyrireikingunum til FM kappróðurin. Fyrsti FM róðurin verður á norðoyastevnu í Klaksvík annan leygardag.
Í kjalarvørrinum av ódnartøkunum í Runavík vísir tað seg, at koronan hevur gjørt um seg.
Róðrarsamband Føroya skrivar soleiðis í kvøld:
Róðrarsamband Føroya er kunnað um, at korona er staðfest millum rógvarar og áskoðarar, sum hava luttikið á ódnartøkum í Runavík leygardagin 22. mai.
Smitta er staðfest í Hósvíkar róðrarfelag og í Róðrarfelagnum Knørrur. Eingin frá Hósvíkar róðrarfelag luttók á ódnartøkum leygardagin.
Landslæknin tekur sær av smittusporing, men fyri at fyribyrgja, at smittan spjaðir seg, heitir Róðrarsambandið bæði á rógvarar og áskoðarar um at vísa varðsemi og at lata seg kanna fyri koronu.