Í kvøld leiktu Bjarni í Selvindi og liðfelagarnir í Kristiansand hálvfinalu í norsku steypakappingini á heimavølli í Aquarama-høllini í Kristiansand.
Helgi H. Hoydal og Tróndur Mikkelsen eru tíverri uttanfyri við skaða, so Bjarni er einsamallur føroyingur á liðnum fyri tíðina.
Tað eydnaðist Kristiansand aftaná eina javna og spennandi hálvfinalu at vinna 34-32 á Halden. Í steðginum var Halden á odda 15-14.
Hetta er annað árið á rað, at Kristiansand vinnur seg í hálvfinalurnar. Í norskum hondbólti er eitt stórt tiltak, ið nevnist: "Final 8". Hetta er eitt vikuskiftið, har hálvfinalistarnir hjá bæði monnum og kvinnum leika hálvfinalur og finalur í norsku steypakappingini.
Sigurin er serliga søtur hjá Kristiansand, ið er næstaftast í bestu norsku hondbóltsdeildini við bert fýra stigum.
Bjarni skoraði eitt mál, legði upp til tvey mál og vann liðnum hjá sær trý brotskøst.
Komandi sunnudag spælir Kristiansand á útivølli móti Sandnes í dysti í bestu deildini.
