? Vit eru bilsin og duga ikki heilt at gjøgnumskoða avleiðingarnar av hesum enn.
Tað er fyrsta viðmerkingin frá Jørn Astrup Hansen, bankastjóra og nevndarformanni í Elektron, nú Høgni Hoydal hevur gjørt av at skera ígjøgnum í stríðnum um persónsupplýsingarnar.
Jørn Astrup Hansen hevði júst fingið kunngerð nr. 94 frá 16. juni stungið í hondina, tá Sosialurin fekk orðið á hann. Hann helt, at skuldi kunngerðin takast fyri fult, so fór hetta at fáa avleiðingar fyri alt peningaligt samskifti, sum er millum Føroyar og onnur lond.
Alt stríðið byrjaði við einari nýggjari skipan, ið peningastovnarnir tíðliga í fjør settu í verk í Føroyum. Hon nevnist Gjaldskipan. Skipanin er ment í samstarvi millum Elektron og Pengeinstitutternes Betalings Systemer (PBS) í Danmark og er ein føroysk útgáva av væl kenda BetalingsService hjá PBS. Talan er sostatt um sjálvvirkandi peningaflytingar, sum fara til Danmarkar at venda og avgreiðast.
Sambært nýggju kunngerðini er hetta ikki loyvt. Men Jørn Astrup Hansen sigur, at tey fyribils fara at halda fram at brúka hana, sum einki var hent, tí tey hava fingið loyvi til tess frá Dátueftirlitinum.
Nýggja kunngerðin er afturvirkandi. Sagt verður, at hon fær gildi frá 1. januar 2002, og tað er áðrenn nýggja Gjaldskipanin kom í gildi. Sostatt er lítið at ivast í, at kunngerðin er ætlað at fevna um Gjaldskipanina.
? Fer tað at vísa seg, at Gjaldskipanin verður steðgað, so er ein nýggj støða. Vit hava fingið loyvi til at brúka hana, og eg kann ikki útiloka, at talan verður um eitt rættarmál, tí tað hevur kostað okkum og okkara kundum nógv at fara yvir til skipanina, sigur Jørn Astrup Hansen.
Eitt rættarmál fer helst bæði at snúgva seg um, hvørt Høgni Hoydal hevur lógina við sær, og í øðrum lagi verður talan um eitt endurgjaldskrav.
Jørn Astrup Hansen undrast annars stórliga um orðaljóðið í kunngerðini. Hevði tað verið slagið av upplýsingum, sum var kjarnin í henni, so hevði hann skilt tað. Men eftir øllum at døma er ætlanin at raka peningastovnarnar serliga.
? Eg upplivi hetta sum serlóggávu fyri okkum, og tað havi eg ilt við at skilja. Um endamálið er at verja Elektron, so hevði tað verið best, um tosað var um hetta millum partaeigararnar av Elektron, sum eru landsstýrið og peningastovnarnir í felag, sigur Jørn Astrup Hansen.
