Orsøkin til, at løgmaður hevði kunna valt sama valdag, sum forsætisráðharrin í dag valdi er, at Lars Løkke Rasmussen ikki hevur nýtt stytstu freistina at skriva út val, sum er 20 dagar. Hann hevur brúkt 29 daga freist, og tí kann løgmaður í morgin skriva út løgtingsval at vera sama dag.
Tí tá løgtingsval verður skrivað út, skal tað haldast í minsta lagi 28 dagar eftir og í mesta lagi 35 dagar eftir at tað verður skrivað út.
Men løgmaður ætlar sær ikki at halda løgtingsvalið sama dag sum fólkatingsvalið. Tað hevur hann sagt fleiri ferðir, og í samrøðu við Sosialin í kvøld segði løgmaður, at løgtingsvalið verður seinasta møguliga valdagin, 31. august.
Lars Løkke Rasmussen er tann forsætisráðharrin, sum hevur sitið longst í einum valskeiði í Danmark yvirhøvur. Í Danmark er ikki vanligt, at Fólkatingið situr í fýra á tamb, so sum vanligt hevur verið í Føroyum.
Síðani 1849, tá Danmark fekk fólkaræði, er tað ongantíð hent, at forsætisráðharri og eitt Fólkating hava sitið so tætt upp á fýra ár, sum stjórnin hjá Lars Løkke Rasmussen hevur sitið.
Tann sum kemur tættst upp á metið hjá Løkke er Jens Otto Kragh í 1964. Fólkatingsval var í 1960, og tað Fólkatingið sat í 3 ár, 10 mánaðir og 23 dagar. Tá fólkatingsvalið verður 5. juni hevur Fólkatingið sitið í 3 ár 11 mánaðir og 17 dagar.
Valskeiðið 1939 til 1943 var tó eitt sindur longri. Tá sat Fólkatingið í 3 ár, 11 mánaðir og 20 dagar. Men tá vóru tveir forsætisráðharrar. Thorvald Stauning doyði í 1942 og Vilhelm Buhl tók við.
