Ófriðurin í Turkalandi í sambandi við kvettroyndina ímóti forsetanum Erdogan fríggjakvøldið og leygarnáttina er ikki av enn.
Tíðindastovan AFP skrivar, at fleiri staðni í Turkalandi eru framvegis samanbrestir millum trygdarlið hjá Erdogan og fólk, ið stuðla kvettroyndini ímóti forsetanum.
Við ein flogvøll í Istanbul royndu kvettmakarar at sleppa undan hernaðarliðum, men teir máttu at enda yvirgeva seg.
Í milliónabýnum Konya hava samanbrestir í dag verið millum myndugleikar og stuðlar av kvettroyndini. Har nokta kvettmakararnir at yvirgeva seg.
Tað vóru partar av herinum, sum fríggjakvøldið royndu at yvirtaka valdið í Turkalandi, men royndin miseydnaðist. Millum annað tí at sivilfólk í stórum tali fóru út á gøturnar at stuðla Erdogan. Óvápnað fólk fóru óttaleys ímóti stríðsvognum fyri at steðga teimum.
Erdogan forseti hevur í dag biðið sínar stuðlar um verða verðandi úti á almennum støðum komandi dagarnar.
