Aimé Jacobsen verður nýggjur borgarstjóri í Sørvágs kommunu. Tað veit Vágaportalurin at siga í dag. Aimé Jacobsen gjørdist toppskorari á lista A, sum eisini fekk meirilutan av umboðunum í kommunustýrinum. Tað skuldi tó ikki vísa seg at at vera so líkafram at skipa seg.  Keldur hjá in.fo siga, at ósemja stakk seg upp millum trý av umboðunum á Lista A og nýggja umboðið, Jóhan Fróa á Ørg. Jóhan Frói á Ørg, sum seinastu setu umboðaði lista B, stillaði hesa ferð upp fyri lista A og varð næstvaldur á listanum. Tá semja ikki kundi finnast á listanum, varð leitað uttan fyri, og tá eydnaðist tað Aimé Jacobsen at fáa stuðul frá Anne Sophie Nordendal, trið valdu á list B. Tey hava tí skipað seg við Aimé Jacobsen sum borgarstjóra meðan Anne Sophie Nordendal verður varaborgarstjóri. Tær vera fyrsti kvinnuligi borgarstjóri og varaborgarstjóri í Sørvágs kommunu, skrivar Vágaportalurin. Hetta merkir, at báðar kommunurnar í Vágunum hava kvinnuligan borgarstjóra og varaborgarstjóra. Í meirilutanum sita so tær báðar saman við Marnu Kárvør Jacobsen og Jákup á Stongum. Í minnilutanum sita fráfarandi borgarstjórin Sune Jacobsen, Elsebeth Jóhanna Klode Davidsen og Jóhan Frói á Ørg.