Sosialurin var sjálvandi ikki á hesum samgongufundi, so vit kunnu bara endurgeva tað, sum onnur hava sagt okkum. Vit hava spurt umboð úr øllum flokkunum, sum vóru til staðar, og øll siga við ein munn, at Lisbeth L. Petersen ikki vildi hava Heðin Mortensen at yvirtaka borgarstjórasessin.
Og tað var júst hetta, vit vildu lýsa í greinini, at Heðin Mortensen hevur verið ein »trupulleiki« fyri Sambandsflokkin fleiri ferðir, og at hetta kostaði Lisbeth L. Petersen høvið at gerast Føroya Løgmaður. Í 1990 kostaði tað eftir øllum at døma Sambandsflokkinum fólkatingssessin, at Heðin Mortensen ikki var á listanum, og í 2004 kostaði tað Sambandsflokkinum borgarstjórasessin í Tórshavnar Kommunu, at hinir býráðslimirnir hjá flokkinum ikki vildu hava Heðin Mortensen í borgarstjórasessin.
Hvussu leikur fer í málinum um nýggja fíggjarmálaráðharran - sum fekk øði í grindina hesaferð - frætta vit helst nærri um seinni í dag.
Men Listbeth L. Petersen skal vita tað, at Sosialurin rennur ikki ørindi fyri ávísan politiskan flokk ella ávísar politikarar. Okkara aðaltáttur er at lýsa mál frá fleiri síðum til tess at fáa veruleikan fram.
Men veruleikin kann vera illa lýddur - og uppfatanirnar kunnu vera fleiri. Í hesum føri eru tað fleiri av býráðslimunum í Tórshavnar kommunu í 1994, sum hava aðra uppfatan enn Lisbeth. L. Petersen.
