Bæði gjáramorgunin og í morgun hevur danska løgreglan ruddað sonevndu Pusher Street á Christiania í Keypmannahavn. Í Pusher Street selja tey hassj púra opið, men av og á ger løgreglan herferð í móti søluni.
Í gjár fór løgreglan eisini eftir persónum, sum høvdu keypt hassj á Christiania, og 82 fólk vóru skuldsett fyri at hava hassj uppi á sær.
Løgreglan gjørdi eisini rannsóknir ymsastaðni á Christiania og legði hald á ymisk sløg av hassji og pengar, sum stavaðu frá sølu. Í tí sambandi vórðu trý fólk handtikin.
Sambært løgregluni heldur átakið á Christiania fram í dag og í morgin.
