Fyrstu 11 mánaðirnar í ár hevur landskassin fingið 21,3 milliónir krónur fleiri inn enn sama tíðarskeið í fjør.
Tað vísir ein uppgerð hjá TAKS.
Hgartil í ár hevur landið fingið 1,1 milliard krónur inn í skatti, og tað eru 1,9 prosent.
Hinvegin hava føroysku kommunurnar fingið eitt vet minni inn í skatti fyrstu ellivu mánaðirnar í 2013 samanborið við sama tíðarskeið í fjør.
- Higartil í ár hava kommunurnar fingið eina 1,3 milliardir krónur inn í skatti, og tað eru 4,6 milliónir krónur ella 0,36 prosent minni enn sama tíðarskeið í fjør.
Fyrstu ellivu mánaðirnar í ár eru 213 milliónir krónur komnar inn í eftirlønarskatti og 65 milliónir í kirkjuskatti.
- Eftirlønarskatturin er væl hægri enn í sama tíðarskeiði í fjør, ella góðar 20 milliónir krónur meira. Eftirlønir, ið verða fluttar uttanlands, vórðu ikki skattaðar fyrra hálvár í fjør, og tí eru tølini ikki heilt sambærilig.
|
