Jann Benjaminsen fekk tíverri bert fáar minuttir á vøllinum móti dystarenda í kvøld tá lið hansara, Hødd spældi fyrru uppflytingarfinaluna móti Stjørdal úr næstbestu norsku fótbóltsdeildini.
Kavi órógvaði illa dystin í Hødd í kvøld, men tað eydnaðist at fullføra dystin.
Hødd vann 3-2 og hevur sostatt ein lítlan fyrimun undan seinnu uppflytingarfinaluni í Stjørdal komandi leygardag klokkan 15.
Hødd var á odda 3-1, og tað iðrar teir í Hødd, at teir ikki hildu ta leiðsluna til returdystin.
Samlaði vinnarin spælir í næstbestu deildini komandi ár.
Vegurin er langur hjá Hødd. Fyrst máttu teir ígjøgnum tveir strævnar dystir móti Arendal fyri at vinna rættin at møta Stjørdal í uppflytingarfinalunum, men leygardagin fæst so at vita um tað ber ella brestir.