Løgmaður: – Tit fáa endurgjald um tit avlýsa

Hetta kann bara tulkast sum ein beinleiðis áheitan til festivalarnar í summar, serliga G! festivalin, um at avlýsa

– Landsstýrið er sinnað at endurrinda útreiðslur hjá tónleikafestivalum, sum avlýsa teirra tiltøk í sambandi við almennu tilmælini um at fyribyrgja COVID-19.

 

Soleiðis sigur Landsstýrið í tíðindaskrivi nú seinnapartin í dag, aftaná tað er greitt, at koronusmittan er blussað upp aftur í Føroyum.

 

Tí verður ein lóg um stuðul til tónleikafestivalar í sambandi við COVID-19 løgd fyri Løgtingið.

 

– Vit eru í hægstu summartíð, og mongu áhugaverdu og fjølbroyttu tónleikafestivalarnir kring landið mynda í stóran mun hesa ársins tíð, sigur Bárður á Steig Nielsen, løgmaður.

 

– Hevur koronustøðan við sær, at tað er neyðugt at avlýsa tónleikafestivalar, er talan um ein fíggjarligan smeit hjá fyrireikarunum. Hesa støðuna vilja vit í landsstýrinum bøta um, so at smeiturin ikki verður so dyggur, sigur hann.

 

Uppskotið um stuðul til tónleikafestivalar, ið landsstýrið ætlar at leggja fyri Løgtingið, verður eftir sama leisti sum í fjør.

 

G! festivalurin skal eftir ætlan komandi vikuskiftið, og nú er óvist, hvussu fyriskipararnir fara at gera, aftaná hesa útsøgn frá Landsstýrinum. Sigvør Laksá, stjóri í G! Festivalinum, fer at greiða frá í tíðindunum á FM1 klokkan 17 - so lurta tá.