Hvar og hvussu fert tú at halda nýggjár?
- Sum vágbingur verður nýggjárið sjálvsagt hildið í Vági - og sum vant haldi eg nýggjár saman við familjuni. Vit brenna bál saman við vinum og kenningum í grannalagnum seint seinnapartin, og síðan eta vit í familjuni ein betri bita.
Tað sigur Dennis Holm.
Hann vísir á, at nakað fyri midnátt gongur leiðin oman á Tríkantin á Sandinum, sum er miðdepilin fyri stóra og minniliga nýggjárshaldinum í Vági.
- Løtan um midnáttarleitið við faklagongu gjøgnum býin, dreka-skrýddum báti á Tríkantinum, sálminum "Tíðin rennur sum streymur í á", báli og stórum fýrverksshowi er hátíðarlig og stórsligin - og eisini ein hábærslig gonga frá gamla árinum inn í tað nýggja, har vit takka fyri árið, ið fór, og ynskja hvørjum øðrum gott nýggjár.
Hvat var tað besta, sum hendi í 2021?
- Árið, ið fór, hevði nógvar góðar og hendingaríkar løtur sama við familjuni - ikki minst, tá vit øll ferðaðust saman í egnum landi, sum vit gera hvørt ár. Tíðin í fólkaskúlanum er nakað serligt, eisini fyri okkum foreldur, og í juni bleiv elsti sonurin liðugur við fólkaskúlan, meðan yngsti sonur byrjaði í 1. flokki í august.
Og hvat var tað keðiligasta?
- Eg dvølji sjáldan við keðiligar upplivingar, men nú vit hava arbeitt við fyrireikingunum til nýggjárshaldið, so er eitt stórt tómrúm, eftir at býarmyndin og vinmaðurin, Hans í Líðini, sum so brádliga andaðist tíðliga í summar.
Hvørjar vónir hevur tú fyri 2022?
- Eg havi góðar vónir til komandi ár. Eri spentur til várið, tá Ronja, dótturin, verður fermd, og eg gleði meg til aftur at sleppa njóta summarløturnar uttanlands saman við familjuni - nakað, sum vit øll hava saknað í hesum covid-19-tíðum.
Gevur tú eitt nýggjárslyfti?
- Nei, eg gevi ikki nýggjárslyfti, sigur Dennis Holm.
