Álop á mál í 14 býum í Irak í morgun hava kravt í minsta lagi 91 mannalív, og minst 161 fólk eru særd. Tað siga trygdar- og sjúkrahúskeldur við fronsku tíðindastovuna AFP, og tær leggja afturat, at hetta er tann blóðugasti dagurin í landinum í meiri enn tvey ár.
Álopini vóru í Bagdad og fleiri býum har norðuri í landinum. Í sjálvum høvuðsstaðnum vóru seks spreingingar og ein sjálvmorðsatsókn. Í býnum Kirkuk eru fýra bilbumbur brostnar, og nakað norðan fyri Bagdad lupu vápnaðir menn á eina støð hjá irakska stjórnarherinum og skutu minst sjey hermenn.
Dagurin í gjár var eisini sera blóðugur í Irak. Minst 17 fólk lótu lív í bumbuálopum, og meiri enn 100 vórðu særd.
