Í dag fer Jóhan Petur Poulsen fyri fyrstu ferð at hava ábyrgdina av besta liðnum hjá Víkingi. Higartil hevur hann havt ábyrgdina av næstbesta liðnum. Fríggjakvøldið stóð hann at vera hjálparvenjari, tá ið næstbesta liðið hjá Víkingi vann toppdystin á útivølli ímóti NSÍ 3-2. Sven Olsen stóð at vera venjari.
Tað er greitt, at broytingar verða gjørdar á liðnum hjá Víkingi ídag, tá ið sammett verður við síðsta dystin, tá ið Eyðun Klakstein var venjari. Hann varð uppsagdur í næstsíðstu viku, og felagið boðaði frá, at tað nú vera fleiri á liðnum, sum eru uppvaksnir í felagnum.
Felagið hevur boðað frá, at miðverjin Vukasin Tomic er givin í felagnum, og Lukasz Cieslewicz er ikki í ferðalagnum norður til Margáir. Hann flutti í vetur úr B36 og til Víking, har hann hevur verið við í øllum 18 landskappingardystunum. Sambært faroesoccere.com er hann tvær ferðir skiftur inn og ellivu ferðir skiftur út. Lukasz hevur skorað trý mál.
Fríggjakvøldið skoraði Elias Lervig sigursmálið. Hann hevur ofta verið vongverji í vinstru higartil í ár, men í dag verður hann ikki millum teir fyrstu ellivu. Tí er sannlíkt, at Bergur Gregersen verður vongverji.
Arnbjørn Svensson, Geza David Turi, og Noah Mneney vóru ikki á listanum hjá næstbesta liðnum fríggjakvøldið. Tí er sannlíkt, at Jóhan Petur Poulsen ætlar, at teir skulu eiga stóran leiklut ídag.
Tá ið Víkingur 21. juni vann 2-0 við Margáir, vóru bæði Vukasin Tomic og Lukasz Cieslewicz á beinkinum. Lukasz varð skiftur inn, tá ið tað restaði eitt korter. Ta ferðina vóru Geza David Turi, Ingi Jonhardsson, Elias Lervig og Noah Mneney millum teir fyrstu ellivu.
