Í morgin verður landsdystur í styrki í Ítróttarhøllini í Vági. Hetta er annað árið á rað, at skipað verður fyri hesi kappingini, har tveit føroyingar dystast ímóti tveimum danskarum í styrki.  Sum nakað nýtt verður kappingin í ár hildin í Suðuroy. Føroysku umboðini eru Bogi Hammer og Bjarni Nielsen, sum blivu nummar eitt og tvey í kappingini um at gerast Føroya Sterkasti 2013. Teir skulu aftur í ár kappast ímóti danskarunum Mikkel Leicht og Nicolai Hansen. Kappast verður í fimm greinum: Farmers walk, tire flip, greb, power stairs og lyfta steinar á platt. Men eisini er ætlanin at hava eina serliga kapping, tá tær fimm greinarnar eru avgreiddar. - Vit hava fingið høv úr Sumba og Hvalba, og er nøkur orka, tá vanliga kappingin er liðug, fara vit at royna okkum við at lyfta hesi høvini, sigur Bogi Hammer, sum umframt at luttaka eisini fyriskipar kappingina. Væntandi tekur kappingin ein góðan tíma. - Fyri at gera eitt sindur eykað burturúr kunnu fólk, sum koma at hyggja, eisini sjálvi royna seg við okkara útgerð og eisini lyfta høvini, sigur Bogi Hammer. Fyrrapartin vitjaðu teir fýra sterku menninir í morgunsendingini á Rás2. Hoyr ta samrøðuna við at trýsta á pílin undir myndini. Landsdysturin í styrki byrjar klokkan 16. í morgin í Vági.