Landsstýriskvinnan í mentamálum, Helena Dam á Neystabø, setti í apríl í ár ein arbeiðsbólk, sum varð biðin um at gera tilmæli um, hvar tjóðleikhús til virksemið hjá Tjóðpalli Føroya skal vera. Arbeiðsbólkurin skuldi meta, hvørt virksemið kundi hýsast í verandi bygningum, t.d. í fyrrverandi Bakarínum hjá Frants Restorff í Tórsgøtu, sum áður skotið upp í álitinum Tjóðpallur Føroya og tjóðleikhús føroyinga uppskot til hølisloysnir.
Eftir ástøðiligum kanningum er niðurstøðan hjá arbeiðsbólkinum, at besta loysnin er at byggja nýtt tjóðleikhús, og mælt verður til at byggja tjóðleikhúsið á Skálatrøð. Arbeiðsbólkurin hevur sostatt í tilmæli sínum frá 3. juni 2011 mælt landsstýriskvinnuni til beinanvegin
at fara í tingingar við Tórshavnar býráð um staðsetingina av einum tjóðleikhúsi á Skálatrøð, og
at seta í gongd arbeiðið at gera ítøkiliga byggiskrá sum grundarlag fyri útbjóðing av byggiverkætlanini.
Landsstýriskvinnan hevur tikið tilmælið til eftirtektar og hevur tann 7. juni 2011 heitt á Tórshavnar býráð um at viðgera tilmælið. Undirtøka fyri at arbeiða víðari við loysnini er fingin á landsstýrisfundi í dag.
Hølisumstøðurnar hjá okkara tjóðleikhúsi eru, sum flestum kunnugt, út av lagi vánaligar. Tórshavnar býráð hevur higartil víst stórsinni við at lata Tjóðpallin búleikast í Gamla Meiarínum, men hølini eru bert ætlað sum ein fyribilsloysn. Á løgtingsfíggjarlógini fyri 2011 eru játtaðar kr. 5 mió., sum eru ætlaðar til at fyrireika bygging av tjóðleikhúsi, finna hóskandi øki, og at gera skitsu og detailprosjektera nýggja húsið. Landsstýriskvinnan vónar, at gongd nú av álvara kemur á málið við tilmælinum frá arbeiðsbólkinum.
Í samtykta íløgukarminum á Løgtingsins fíggjarlóg fyri 2012-2016 eru settar av kr. 66 mió., umframt tær 5 mió. í 2011 til bygging av tjóðleikhúsi.
