Majken Sandá er sett í starv, sum nýtt trivnaðarfólk í Vágs kommunu. Starvið er eitt samansett móttøku-, samskipara- og skrivstovustarv.
- Trivnaðarfólkið kemur at røkja móttøkuna í kommununi og samskipa og fyriskipa tiltøk, sum tæna kommununi í breiðum høpi.
Í Vágs kommunu siga tey, at trivnaðarfólkið eisini kemur at røkja skrivstovuuppgávur, sum antin standast av áðurnevndu uppgávum hjá trivnaðarfólkinum, umframt aðrar fyrisitingarligar uppgávur.
Majken er ikki ókend í kommununi. Hon hevur verið avloysari í Miðlatúni frá 2019, og til hon gjørdist skrivstovulærlingur í 2021. Eftir lokna læru, hevur hon starvast í Miðlatúni.
Umframt hetta hevur Majken eisini starvast í fíggjarheiminum, sum bankaatstøðingur. Hon er eisini útbúgvin kosmetologur og hevur verið sjálvstøðu vinnurekandi í 14 ár.
Sambært Vágs kommunu byrjar Majken Sandá í starvinum sum trivnaðarfólk í dag, hin 1. februar 2023.