Órudd og burturkast, sum liggur og rekur á sjónum, ella sum liggur á botni, er ein stórur trupulleiki fyri siglingina hjá Strandferðsluni. Tað sigur Jóan Petur Abrahamsen, virkandi stjóri á Strandferðsluna. Hann sigur at í løtuni liggja tvær ferjur hjá Strandferðsluni, tí tær hava fingið brek av burturkasti á sjónum og á botni.
Týsdagin í farnu viku fekk Hasfjord dekkið av einum traktori um skrúvuna og skaðin varð so stórur, at hann mátti á skipasmiðju hjá Mest í Havn, har hann verður liggjandi í einar tvær vikur. Erla Kongsdóttir liggur eisini í løtuni og tað var eisini órudd á sjónum, sum beindi fyri henni. Hjá Erlu Kongsdóttir var tað nakað so lítisvert sum ein plastposi, ið lá og rak í sjónum, sum gjørdi, at hon mátti takast úr sigling. Ein plastposi, sum lá í sjónum, endaði í sjógv-inntakinum, so brek kom á kølingina. Erla Kongsdóttir er nú í dokk á Skála, har brekið verður umvælt. Vónandi verður hon klár í hesi vikuni.
Les eisini: Nógv órudd liggur og sløðist við botnin
Jóan Petur Abrahamsen sigur, at tað er javnan og savnan, at kavara mugu niður at skera av skrúvunum á strandfaraskipunum, tí tað er so nógv órudd í sjónum. Tað er øgiliga nógv órudd í at kalla øllum havnum. Bara hesa stuttu tíðina, Erla Kongsdóttir hevur verið í sigling, hava kavarar verið niðri einar sjey átta ferðir og tikið av skrúvuni, bæði nylon, gágguglúpar, línur frá gágguglúpum og annað, sum liggur í havnini í Nólsoy og aðrastaðni.
Hetta er ein ávaring um, hvussu stórar avleiðingarnar eru av at vit eru so óruddulig, sigur Jóan Petur Abrahamsen.
