Amerikanski sangarin og sjónleikarin Michael Lee Aday, kendur sum Meat Loaf, er deyður, 74 ára gamal.
Tað skrivar Gaffa.dk.
Hann andaðist í gjár, og hann hevði konu sína við sína lið, upplýsir umboðsmaður hansara. Døtur hansara fingu eisini sagt farvæl, verður upplýst.
Sum tónleikari var Meat Loaf serliga kendur fyri tvær útgávur; Bat Out Of Hell frá 1977 og Bat Out Of Hell II, ið kom út í 1993.
Hesar útgávur gjørdi Meat Loaf saman við framleiðaranum Jim Steinman, og fyrra útgávan er millum tær 35 útgávurnar, ið eru mest seldar í USA.
Síðsta útgávan hjá Meat Loaf kom í 2016.
Umframt yrkisleiðina sum sangari, spældi hann eisini við í filmum, m.a. The Rocky Horror Picture Show frá 1975 og Fight Club frá 1999.