Mette Frederiksen, forsætisráðfrú, lurtar eftir flokkunum á Fólkatingi, men vil ikki viðmerkja kravið hjá Radikalu um at skriva út val fyri 4. oktober.
Tað sigur hon við TV2.
– Eg lurti sjálvandi eftir, tí flokkarnir siga í Fólkatingum, og sjálvandi ikki minst eftir okkara parlamentariska grundarlag. Men tá tað kemur til, nær val skal útskrivast, so hava eg onga viðmerkingar til tað, sigur hon.
Eftir minkamálið krevur stuðulsflokkurin tey Radikalu, at Metta Frederiksen skrivar út val, áðrenn fólkatingið kemur saman aftur eftir summarfrítíðina.
Um tað ikki verður gjørt, fer flokkurin at seta fram misálitisuppskot. Tað merkir við øðrum orðum, at tey Radikalu fara at koppa stjórnina.
TV2, sum hevur fingið fatur á forsætisráfrúuni á landsstevnuni hjá DGI í SVendborg, roynir við fleiri spurningum at fáa hana at fyrihalda seg til kravið.
Hon blívur tó við at endurtaka, at hon ikki hevur viðmerkingar til, nær val verður skrivað út, men at lurtar eftir flokkunum.
Hósdagin kom frágreiðingin frá Minkkommisjónini, sum hevur kannað lutin hjá stjórnini í mun til avgerðina um at taka av allar minkarnar.
Hon hevur harðar atfinningar av millum annað forsætisráðfrúuni og fleiri høgum embætisfólkum.
Kommisjónin hevur ikki fyrihildið seg til ráðharraábyrgd, tí tað skal hon ikki sambært lógini.
Tí hava bláu flokkarnir ynskt, at óheftir advokatar skulu gera ein meting av, um grundarlag er í minkamálinum fyri eini ríkisrættarsak.
Tey Radikalu sótu við avgerandi atkvøðunum fyri at fáa sett í verk eina slíka kanning.
Men eftir ein fund hjá teimum Radikalu í gjár kunngjørdi flokkurin, at tey ikki stuðla eini advokatmeting. Í staðin vil flokkurin hava forsætisráðfrúuna at skriva út val.
Fríggjadagin hevði forsætisráðfrúan saman við fýra ráðharrum ein næstan tveir tíma langan tíindafund fyri at svara atfinningunum frá kommisjónini.
Har gjørdi hon greitt, at hon ikki ætlar sær at fara frá sum forsætisráðfrúa.
– Eg havi ongar ætlanir um at leggja frá mær, og tað meini eg heldur ikki, at tað er grundarlag fyri, segði hon millum annað á tíðindafundinum.
/ritzau/
