Manchester City er til reiðar at spreingja øll mørk innan spælarahandlar. Stóri trupulleikin er, at tað ber illa til at fáa røttu spælararnar til hópin.
Enskir miðlar skriva í dag, at umboð fyri Manchester City eru í Milano, har tey hava boðið AC Milan ikki minni enn £100.000.000, um teir vilja selja Kaka, sum í 2007 varð kosin heimsins besti fótbóltsspælari. Somuleiðis sigst felagið vera til reiðar við einum sáttmála, sum gevur brasilsa bóltsnillinginum eina vikuløn upp á £500.000.
Men tað tykist tó nytta lítið. Higar til hevur Milan ikki tikið av, men sum skilst, hevur felagið tørv á peningi, um teir framhaldandi skulu dystast við tey bestu í Europa. Og umboðsmaðurin hjá Kaka sigur, at tað ikki er óhugsandi, at teir fáa loyvi at tosa við enska felagið.
Kaka sjálvur sigur tó, at hann helst av øllum vil verða verandi í Milano.
- Tað eru ikki pengarnir, sum eru altavgerandi. Eg stórtrívist í felagnum, og eg kundi hugsað mær at blivið gamal í felagnum. Ynskja teir hinvegin at selja meg, noyðist eg sjálvandi at taka støðu til tað, sigur Kaka.
