– Tað, sum vit nú síggja, er úrslitið av reglunum um, hvussu nógvan tosk vit kunnu fiska, og hvussu nógv vit kunnu taka burtur úr stovninum, sigur Björn Ævarr Steinarsson, sum er fiskifrøðingur á havrannsóknarstovuni í Reykjavík, við Morgunblaðið.
Hann sigur, at málið við at avmarka fiskiskapin eftir toski er at fáa mest møguligt burtur úr stovninum yvir eitt longri áramál. Herumframt hevur tann politiski myndugleikin sett eitt minstamark fyri, hvussu stórur gýtingarstovnurin skal verða í 2015.
Íslendsku fiskifrøðingarnir søgdu í fjør, at toskastovnurin fór at verða størri í ár, og tað fer væntandi at síggjast aftur í kvotuásetingini fyri næsta fiskiár.
– Okkara royndir vísa, at tað er vorðið munandi meiri av stórum toski tey seinastu árini, og tað, sum vit nú hoyra frá góðum fiskiskapi, samsvarar eisini við tað, sigur Björn Ævarr Steinarsson.
Havrannsóknarstovan hevur júst gjørt tær árligu vármátingarnar av toskastovninum, og úrslitið kemur tíðliga í næsta mánað.
