Tíggju minuttir fyri tíð skuldi Hannes Agnarsson á vøllin saman við Peturi Knudsen og Hera Hjalt Mohr, men eitt skeivt tal hevði sníkt seg á ein av útskiftingarlepunum, ið skulu útfyllast á bonkinum.
Sum skilst, so kom kludur í tí tað bleiv skrivað, at nummar 8 skuldi av vøllinum, tá tað skuldi standa nummar 6. Bjarni Petersen hevði nummar 8 og var á bonkinum, og kundi tí ikki skiftast út. Tað var Hallur Hansson, sum skuldi út. Hann hevði latið liðskiparabandið frá sær, og var til reiðar at fara av vøllinum.
Tað hjálpti heldur ikki, at umboð fyri danska Fótbóltssambandið, ið arbeiddi saman við 4. dómaranum, broytti 8-talið til eitt 18-tal. Her var avbjóðingin, at Petur Knudsen júst var runnin inn á vøllin við nummar 18 á rygginum.
Dómarin valdi brádliga at bríksla dystin í gongd, meðan Hannes Agnarsson stóð klárur at koma inn á vøllin. Tað er óhoyrt í slíkum umstøðum, at ein dómari noktar eini skifting.
Reglugerðin sigur, at tú kanst skifta fimm spælarar inn, men tað skal gerst í trimum steðgnum. Tá Føroyar longu høvdu skift Jóan Símun Edmundsson og Gunnar Vatnhamar út í tveimum ymsikum umførum. Tí endaði tað við, at Hannes Agnarsson ikki kom á vøllin.
- Tað er ein internt mistak frá okkum, men eg haldi eisini at 4. dómari kann vísa eitt sindur av menniskjaligheit í eini slíkari støðu, segði Håkan Ericson, landsliðsvenjari, við FM1 eftir dystin.
##ms##
