Í gjárkvøldið var løgreglan á ferð við tí endamáli at kanna, hvussu skjótt bilar koyrdu. Tey vóru í Søldafirði, har eitt ferðsluóhapp hevði verið í gjáranáttina.
Og tað var ikki til fánýtis, tí tey tóku ein bilførara, sum koyrdi so skjótt, at hann misti koyrikortið á staðnum.
Hann koyrdi nevniliga 108 kilometrar um tíman í bygdum øki, har tað er loyvt at koyra 50.
Umframt at koyrikortið varð tikið á staðnum, fær hann eisini eina trivaliga bót upp á nakrar túsund krónur.
Í gjárkvøldið tók løgreglan eisini ein bilførara, sum koyrdi bil, hóast hann ikki hevði koyrikort og sostatt heldur ikki loyvi til at koyra bil.
