Monika Mohr, Cand.mag. í sálarfrøði og heilsufremjan/heilsustrategi, byrjar sum samskipari í Fólkaheilsuráðnum 1. november.
Monika Mohr hevur drúgvar royndir við verkætlanararbeiði, miðling av heilsuboðskapum, innan vegleiðing, ráðgeving og sjálvboðið arbeiði, og hon hevur royndir við at menna, leggja ætlan fyri og til at skipa fyri heilusfremjandi tiltøkum og átøkum í praksis.
– Við sínari bakgrund og vitan um fólkaheilsu og heilsustrategiir og royndum við heilsufremjandi arbeiði, vil hon vera við til at skapa betri umstøður fyri, at íbúgvar í Føroyum kunnu fremja sína heilsu og ávirka heilsuna hjá hvør øðrum jaliga. Hon hevur fleiri ára royndir við verkætlanini ABC fyri sálarliga heilsu. Hon hevur eisini royndir við øðrum verkætlanum um sálarliga heilsu, skrivar Fólkaheilsuráðið.
– Monika er analytisk sterk og hevur góðar førleikar innan verkætlanararbeiði og kvalitativa gransking og kemur, umframt at taka sær av verkætlanini ABC fyri sálarliga heilsu, at taka sær av kvalitativum kanningum, sum eru í gongd hjá Fólkaheilsuráðunum.
– Fyri Moniku hevur tað týdning, at arbeitt verður við heilsu út frá einum breiðum sjónarhorni, ið er við til at fremja bæði sosialu, kropsligu og serliga sálarligu vælveruna hjá borgarunum.
Monika Mohr hevur seinastu trý árini staðið fyri verkætlanini ABC fyri sálarligari heilsu, sum hevur havt til endamáls at tryggja heilsu hjá borgarum í felagskapi við øðrum.
– Hesi trý árini er eitt stórt arbeiði gjørt fyri at gera borgarar, stovnar og samfelagið sum heild meira tilvitað um týdningin av virksemi, felagsskapi og hugbundni í einum heimi, sum broytist skjótt. Nú skal arbeiðast hart fyri, at seta ABC-grundreglurnar betri í verk úti í samfelagnum, serstakliga fyri okkara ungu borgarar, sigur Magni Mohr, formaður í Fólkaheilsuráðnum.
