MSC kann fáa týdning fyri Vaðhorn Seafood

- Tað er gott og positivt, at MSC-góðkenningin fyri tosk og hýsu undan Føroyum nú er komin í hús, sigur virkisleiðarin á Vaðhorn Seafood, Jens Martin Knudsen.

Jens Martin Knudsen er virkisleiðari á Vaðhorn Seafood á Strondum.

 

 

- Vit eru sjálvsagt positivir um, at toskur og hýsa nú hava fingið MSC-góðkenning, men vit hava higartil ongar trupulleikar havt við at selja okkara fiskavørur, har størstu marknaðirnir eru í Spania og Italia, og ávísir marknaðir eisini eru í Grikkalandi og Portugál.

 

Tað sigur Jens Martin Knudsen, virkiseiðari á Vaðhorn Seafood á Strondum, har tey burtur av arbeiða við saltfiski. Hann vísir á, at tey fáa at kalla ongar fyrispurningar frá keyparum um MSC-góðkenning - ella tað ganga ár ímillum, at slíkir fyrispurningar koma.

 

Virkisleiðarin vísir á, at Vaðhorn Seafood selur ikki so nógv beinleiðis til handilsketur, men hann heldur tað vera hugsandi, at fyrispurningar um MSC-góðkenning í størri mun fara at koma so hvørt, sum hesin parturin av marknaðinum fer at veksa.

 

- Fyri teir prísir, sum vit fáa fyri okkara fiskavørur, trúgvi eg ikki, at MSC-góðkenningin í løtuni hevur nakran týdning, men eg haldi kortini, at tað er gott og positivt, at góðkenningin fyri tosk og hýsu undan Føroyum er komin í hús.

 

Jens Martin Knudsen heldur, at MSC-góðkenningin í fyrsta lagi fer at koma útflutninginum av føroyskar hýsu til Bretlands til góðar, eins og hann væntar, at góðkenningin kann fara at síggjast aftur hjá eitt nú okkara frystilínuskipum, sum fiska og frysta tosk undir Føroyum.

 

- Tað er eisini hugsandi, at so hvørt, sum okkara smápakningur við útvatnaðum saltfiskavørum fer at veksa, fer sølan til handilsketur eisini at veksa. Tá kunnu vit rokna við, at fleiri fyrispurningar fara at koma um MSC-góðkenning, sigur virkisleiðarin á Vaðhorn Seafood.

 

##med2##

 

 

 

 

 

 

 

 

 

 

 

 

 

 

 

 

 

Jens Martin Knudsen er virkisleiðari á Vaðhorn Seafood á Strondum.

Á Vaðhorn Seafood á Strondum snýr alt seg um saltfisk.