Danski keiputeknarin Kurt Westergaard er deyður. Tað upplýsir familja hansara fyri Berlingske.

Hann gjørdist 86 ára gamal. Hann sovnaði stillisliga eftir longri sjúkralegu.

Eftirhann sita kona, fimm børn teirra, tíggju abbabørn og eitt langabbabarn, skrivar Berlingske.

Í fleiri ár mátti Kurt Westergaard liva við lívverjum, eftri at tekning hansara av Muhammed í 2005 varð prentað í danska blaðnum Jyllands-Posten.

Tekningarnar førdu til Muhammedkreppuna, sum er ein av teimum álvarsligastu uttanríkispolitisku kreppum, sum Danmark hevur verið í.

Kurt Westergaard varð føddur í 1935 í Døstrup í Suðurjyllandi.

Í 1958 varð hann útbúgvin lærari á Ranum Seminarium. Árini eftir virkaði hann sum týsktlærari á Grindsted Kost- og Realskole. Hann gjørdist eisini skúlastjóri á einum spesialskúla á Djurslandi.

Hann hevði tó altíð teknað, og í 1983 varð hann settur í starv sum keiputeknari á Jyllands-Posten.

Kurt Westergaard var lutvíst ókendur millum manna fram til 2005, tá Muhammedstekningarnar vórðu prentaðar.

Umframt at skapa uttanríkispolitiska kreppu, gjørdu Muhammedtekningarnar Kurt Westergaard til eitt mál fyri víðgongdar islamistar. Tað er komið fram, at ein samsýning upp á fleiri milliónir varð sett til tann, sum megnaði at drepa hann.

Í 2012 leyp ein somalskur maður á hann í heimi hansara við eini øks. Tað eydnaðist tó Kurt Westergaard at sleppa við skrekkinum við at læsa seg inni á vesinum.

Eftir drápsroyndina kom hann undir skerpað eftirlit hjá PET.

Í 2012 segði hann við BT, at hann skuldi geva PET boð um hvørjar ferð, hann skuldi av húsum, men hann hevði gjørt av, at hann fór at lata PET um at hava óttan.

Fleiri onnur eru eisini handtikin fyri at leggja ætlanir um at drepa Kurt Westergaard.

Í 2010 gavst Kurt Westergaard sum 75 ára gamal á Jyllands-Posten, fyri at brúka tíðina til listarliga virki sítt.

Hann hevur fingið nógvar virðisslønir, eitt nú Danske Bladtegneres hæderspris.

/ritzau/