Kasper Munk hevur nú gjørt ein danskan ungdómsfilm, sum setur fokus á ungar gentur og teirra fyrstu samlegu.
Ungu kvinnurnar í filminum halda sjálvar, at filmurin er eitt sera realistiskt boð uppá hvussu ungdómurin er í dag.
Øll fólk minnast aftur á tíðina sum tannáringur við bæði gleði og sorg. Tá ið allar hugsanir broytast, og fokus verður sett á fyrstu samleguna, sum á onkran hátt er ein skilnaður millum barnaárini og vaksnamannalívið.
Og tað er júst hetta, sum filmurin You & Me Forever snýr seg um. Filmurin hevur frumsýning í morgin.
Filmurin snýr seg um tvær ungar gentur, sum altíð hava verið vinkonur. Men tá ið tær so hitta gentuna Maria, verður vinarlagið brotið, og eina vinkonan leitar sær inn í spennandi heimin hjá Mariu við sex, dreingjum og veitslum.
