Nógv mál í væntu

KÍ - B36
Sosialurin tippar: 2-2
KÍ hevur tað altíð trupult, tá norðoyastevna, sjómanna­dagur og Summarfestivalurin er. Bæði liðini spæla nógvar javnleikir, so eg haldi at ein javnleikur er upp á sítt pláss.
B36 er tað liðið, sum hevur spælt flestar javnleikir í ár – sjey. Meðan KÍ er tað liðið, sum hevur spælt næstflestar javnleikir – seks.
Hetta eru tvey lið, sum kunnu leypa á við nógvari ferð. KÍ hevur spælt nakrar av teimum ferðmiklastu dyst­inum í hesum kapp­ingar­árinum, meðan B36 í nøkr­um ávísum dystum hev­ur víst góðan og skjótan um­stillingar­fótbólt, tá teir fáa rúm at spæla í.
Hetta kann blíva ein spenn­andi dystur við nógv­ari ferð og fleiri málum. For­søgnin sigur, at tað verður ein javnleikur.

AB - Víkingur
Sosialurin tippar: 2-3
Her kundi verið upplagt at sagt, at AB vinnur, tí Víkingur tapur allar úti­dyst­ir­nar, men sannleikin er eis­ini, at AB tapir eisini allar heim­dystirnar. So okkurt verður broytt eftir dystin sunnu­dagin. Tað, sum talar fyri AB er, at Víkingur hevur spælt hálvfinalu í steypakappingini mikukvøldið og tí hevur væl styttri hvíld til dystin.
Hinvegin, so ber tað ikki til at koma uttan um, at argja­menn bara hava fingið tvey stig í alt ár. Hóast teir hava spælt nakrar góðar dystir, so lýgur stigatalvan ikki. Víkingur fekk tveir skaðar á mið­vøllinum mikukvøldið, men liðið tykist nóg sterkt til at vinna á Argjum.
AB kann ikki brúka nakað annað enn ein sigur, so teir koma ikki til at spara upp á krútið, so talan verður ikki um verjukendan dyst. 3-2/2-1 til Víking.

07V - ÍF
Sosialurin tippar: 1-2
07 Vestur tapti farna umfar týdn­ingarmiklan dyst móti TB, sum tyk­ist hava fingið fatur á rætta endanum. Nú byrjar at síggja hættisligt út hjá 07 Vestur, sum bara hev­ur tann eina sigurin at vísa á – móti TB.
ÍF er eitt av liðnum í hesum miðbólkinum, sum øll renna eftir silvurheiðursmerkinum. Teir hava víst hegnið til at koma inn í aftur dystir, tá tað hevur sæð illa út.
07 Vestur hevur bara fing­ið eitt stig á heimavølli sein­astu tríggjar dystirnar og tað var móti AB, sum fekk ein mann útvístan tíðliga í seinna hálvleiki.
ÍF hevur hinvegin bara vunnið ein av teimum sein­astu seks og tað var somu­leiðis móti AB, men ÍF tykist hava munin á 07 Vestur.

NSÍ - TB (Dysturin hesa vikuna)
Sosialurin tippar: 2-0
Hyggja vit burtur frá tveim­um teimum fyrstu umfør­inum, so hevru NSÍ vunnið fýra, spælt fýra javnar og tapt ein. Tað er ein fín úr­tøka. Hyggja vit somuliðis burt­ur frá tveimum teimum fyrstu umførinum hjá TB, so hava teir vunnið tríggjar, spælt fimm javnar og bara tapt ein. Felags fyri bæðini liðini er, at ósigurin kom fyri odda­liðnum HB.
So talan er um tvey jøvn lið, har útiliðið hevur tvey stig færri, men hevur fyri­mun av longri hvíld, tí NSÍ hevur spælt hálvfinalu miku­kvøldið.
Her hevði eisini verið upp­lagt at lagt seg eftir einum javnleiki, men við sigrinum á Víkingi vísti NSÍ eina nýggja síðu av sær sjálvum. Ein sig­ur, har teir eru avgjørdir á sein­asta triðinginum.
NSÍ vinnur við tveimum mál­um, eftir at TB móti enda­num leggur seg eftir at heinta eitt málsleiðsluna hjá NSÍ.

EB/Streymur - HB
Sosialurin tippar: 2-4
Tað gongur bara ein veg hjá HB og tað er frameftir. Har eru fleiri spælarar, sum skulu vinna sær pláss á lands­liðnum, so teir eru óiva tendr­aðir, með­an EB/Streymur hevur spælt í steypa­kappingin miku­kvøld­ið.
HB trumlaði AB niður í Gundadali uttan stórvegis hóva­sták og tí eru beinini frisk til at takast við verandi FM vinn­ararnar, sum eru komnir væl fyri seg.
Vit hava fyrr sæð nógv mál í dystinum millum hesi liðini og tað var bara fantaskiskum málmansspælið at takka, at einki mál kom seinast liðini hittust.
Ein spennandi dystur við nógvum framrættaðum spæli, har HB vinnur áleið 3-1/4-2. Kanska enntá 4-3.