Nú stendur hann á gáttini

Barrack Obama og Hillary Clinton sunnu sum væntað hvør sítt uppstillingarval í nátt, hann í Oregon og hon í Kentucky. Sigurin hjá Hillary Clinton var sera greiður. Hon vann við meiri enn 30 prosentstigum, men tá skal havast í huga, at Kentucky er ein statur við einari stórari hvítari ar­beið­arastætt, sum Hillary Clin­ton hevur havt gott tak á undir valstríðnum.

Kanningar í Kentucky avdúkaðu, at tað er ein sera breið og djúp gjógv ímillum teir demokratisku velj­ar­arn­ar. Tveir triðingar av teim­um, sum atkvøddu fyri Hil­lary Clinton, søgdu bart út, at tey fara annaðhvørt at sita við hús ella at atkvøða fyri republikanaranum John McCain, um Barrack Obama verðu valevni hjá demokratiska flokkinum í heyst.

Á gáttini

Sambært sjónvarpinum CNN hevur Barrack Obama nú tryggjað sær undirtøku frá 1.627 av teimum 3.253 valmonnunum, sum verða valdir á uppstillingar­val­unum kring landið.

- Vit hava fingið meiri­lutan av teimum, sum amer­ikanska fólkið velur, og tí standa vit nú á gáttini til málið, sum er at røkka upp­stillingini, segði Barrack Obama í sínari sigursrøðu, sum hann helt í Des Moines í Iowa.

Tað er ikki líkt til, at Obama kann fáa teir 2.026 valmenninar, sum eru neyð­ugir fyri at tryggja sær meiri­luta á endaliga upp­stillingarfundinum hjá demo­kratiska flokkinum, og tí verða tað tey sokallaðu »superumboðini«, sum skulu gera av, hvønn flokk­urin skal stilla upp í heyst. Tað ásannaði fremsti val­fyrireikarin hjá Obama, David Axelrod, eisini í nátt.

- Hetta var eitt sera týð­andi stig, men ikki endin, segði hann við CNN.

Hillary heldur á

Politiskir serfrøðingar hava ávarað Barrack Obama ímóti at leypa á Hillary Clinton, tí tað kann fáa demokratiskar veljarar at venda honum bakið. Tað hevur hann tikið til eftir­tektar, og í sigursrøðu síni í nátt rósti hann Hillary Clinton fyri hennara lut í amerikonskum politikki.

- Hon hevur víst dirvi og áhaldni, og hon hevur flutt mørk og broytt tað Amerika, har mínar døtur og teirra døtur skulu veksa upp. Tað takka vit henni fyri, segði Obama.

Hillary Clinton endurtók í nátt, at hon ætlar sær at halda á til tey seinastu upp­stillingarvalini, sum eru tann 3. juni.

- Í kvøld hava vit vunnið ein týðandi sigur, sum eisini er ein dygg álitisváttan, segði hon í takkarrøðu síni í Kentucky.

Trý uppstillingarval eru eftir. Tey eru í Puerto Rico (55 valmenn), Montana (16 valmenn) og í South Dakota (15 valmenn).