Nato hevur eina samstarvsavtalu við Russland, sum er 25 ára gomul, og nú vilja fleiri Nato-lond siga avtaluna upp, men semja er ikki í verjusamgonguni.
Tað er russiska innrásin í Ukraina, sum er orsøkin til, at fleiri Nato-lond vilja siga avtaluna upp, tí tey siga, at hon er brotin, nú Russland er lopið á Ukraina.
Áðrenn toppfundin í Nato, sum verður í Madrid, mugu londini í verjusamgonguni gerast samd um, hvussu viðurskiftini við Russland skulu verða í framtíðini.
- Avtalan er deyð, segði bretski uttanríkisráðharrin, Liz Truss, tá uttanríkisráðharrarnir í Nato hittust til ein óformellan døgurða mikudagin.
Hon heldur, at avtalan, sum Nato hevur við Russland, skal leggjast til viks, sum hon tekur til.
- Avtalan bygdi á, at Nato og Russland ikki síggja hvønn annan sum fíggingdar. Okkum tørvar eina nýggja "nærkan" til trygd í Evropa, sum byggir á haldføri, verju og ræðing, segði hon.
Nato-aðalskrivarin, Jens Stoltenberg, sigur, at Russland hevur tikið seg burtur úr avtaluni á allar hugsandi hættir við - ikki bara einaferð, men tvær ferðir - at leypa á Ukraina, og her sipar hann til, at Russland tók Krim-hálvoynna frá Ukraina í 2014.
Jens Stoltenberg váttar, at Nato-londini eru ikki samd um, hvussu fram skal farast við Russlandi í hesum sambandi.
- Tað eru ymiskar meiningar um, hvørt avtalan skal liggja, har hon liggur - ella, um hon skal sigast upp, sigur Jens Stoltenberg.
