Hoyvíkingar høvdu føroyameistararnar í Neistanum á vitjan, men hóast H71 fekk bitið eitt sindur frá sær, rakk tað ikki til meira enn eitt heiðurligt úrslit ímóti teimum bláu.
Neistin legði bragdliga fyri og kom á odda 5-0, men so treiskaðust teir á heimaliðnum, so leiðslan hjá Neistanum bara var eittans málið í hálvleikssteðginum.
Í seinna hálvleiki kom H71 tó ongantíð so nær, og Neistin kundi trygt koyra sær sigurin heim.
KÍF basti Kyndli
Hin dysturin í Atlantic Airways-kappingini hjá monnum var á Hálsi í Havn millum Kyndil og KÍF, og her gjørdi KÍF av við heimaliðið í seinna hálvleiki og vann við átta málum.
Her fylgdust liðini tað mesta av fyrra hálvleiki, og Kyndil hekk uppi í kollfirðingum inn í hálvan seinna hálvleik, men so rakk tað ikki longur.
KÍF setti ferð á tað síðsta korterið og vann at enda stórt, so alt bendir á, at kollfirðingar aftur í vetur eru eitt lið, roknast skal við.
Trý verða fremst
Enn er ov tíðliga at meta um, hvussu tey ymsu liðini fara at standa seg í vetur, men í øllum førum sær út til, at Neistin og KÍF fara at vera við heilt har frammi.
So er spurningurin, um VÍF ikki eisini kann bjóða av, tí vestmenningar hava havt rímiliga stóra og góða tilgongd av spælarum, so kanska tað verður ein kapping millum trý lið.
Í løtuni sær ikki út til, at nakað av hinum liðunum kann gera seg galdandi, men fyri tað kann kappingin saktans fara at líkjast henni síðsta vetur, tá stórt sæð øll kundu taka stig frá øllum.
