Halda fast um javnvág á fíggjarlógini í 2016

Bæði samgongan og andstøðan halda fast um, at javnvág skal vera á fíggjarlógini í 2016

- Javnvág skal vera á fíggjarlógini fyri a2016.

 

Tað eru bæði samgongan og andstøðan í Fíggjarnevndini samd um.

 

- Og fíggjar- og búskaparpolitikkurin í Føroyum skal leggjast til rættis og rekast samsvarandi, leggur fíggjarnevndin afturat.

 

Uppskotið til fíggjarlóg fyri næsta ár, sum landsstýrið legði fram, hevði eitt hall á 250 milliónir krónur, staðfestir Fíggjarnevndin.

 

Tað eru 15 milliónir hægri enn hallið var í játtanarkørmunum, ið Løgtingið samtykti í vár, og sum hevði 235 milliónir í halli.

 

- Við teimum broytingum, ið fíggjarnevndin nevndin hevur gjørt, umframt nýggjar inntøkumetingar frá landsstýrinum, verður bæði úrslitið hjá meirilutanum og hjá minnilutanum eitt minni hall enn á samtyktu fíggjarkørmunum fyri 2014.

 

Fíggjarnevndin staðfestir, at nýskipanir og rationaliseringar mugu fremjast á týðandi økjum.

 

- Tær eru avgerandi fyri, at vælferðin í Føroyum kann varðveitast á einum rímiligum stigi frameftir.

 

- Eisini eru tær neyðugar fyri at røkka málinum um javnvág á FL2016.

 

 Nevndin fýlist á, at neyðugar nýskipanir ikki eru framdar, tí nýskipanir tryggja, at borgarar fáa sum mest og best tænastur fyri hvørja skattakrónu.

 

Nevndin sóknast eftir ætlaðu fiskivinnunýskipanini. Tað hevur stóran týdning at fáa hana frá hondini, tí verandi skipan fer úr gildi í 2018.

 

- Vinnukarmarnir hjá høvuðsvinnuni skulu leggjast í trygga legu, og fiskivinnunýskipanin skal tryggja støðugan búskaparvøkstur sigur Fíggjarnevndin.

 

- Hóast heimsfevnandi búskaparkreppu seinnu árini hevur føroyski búskapurin staðið seg munandi betur enn aðrir búskapir, og kreppan hevur ikki gjørt seg eins nógv inn á vælferðartænastur her sum í øðrum londum, staðfestir Fíggjarnevndin

 

Nevndin hevur áður víst á trupulleikarnar, har ið játtanirnar til ymsar verkætlanir ikki verða brúktar

 

Aftur í 2013 er líkt til, at íløgur fyri 141 milliónir ikki verða gjørdar.

 

- Hetta er als ikki nøktandi, og gongur ímóti Løgtingsins vilja. Ætlanin hjá tinginum við verkætlanum er at skapa arbeiðspláss í einum búskaparligum lágkonjunkturi, og tað er átaluvert, at verkætlanir ikki verða framdar, sum ætlað, sigur Fìggjarnevndin.