103 umsøkjarar gjøgnum kvotu 2

Tað eru serliga fýra útbúgvingar, ið tey flestu vilja lesa

Tá freistin at søkja inn á lestur á Setrinum gjøgnum kvotu 2 var úti 15. apríl, hevði Setrið fingið umsóknir frá 103 umsøkjarum. Tað skrivar setur.fo.

Kvota 2 er fyri umsøkjarar, ið antin ikki hava nóg høgt miðalpróvtal í gymnasiala miðnámspróvnum til at verða upptikin gjøgnum kvotu 1, hava útlendsk miðnámsprógv ella einki miðnámsprógv hava.

Í ár var møguligt at søkja inn á 12 bachelorútbúgvingar, men tað vóru serliga sjúkrarøktarfrøði, námsfrøði, fólkaskúlalærari og lóg, ið høvdu stóran áhuga millum umsøkjararnar.

- Í ár eru 36 kvotu 2 umsóknir til sjúkrarøktarfrøði, í mun til 30 í 2018, 20 umsóknir til fólkaskúlalærara, í mun til 29 í 2018, og 29 kvotu 2 umsóknir til námsfrøði, í mun til 32 í 2018. At 16 kvotu 2 umsóknir eru til løgfrøðilestur vísir á ein stóran áhuga fyri hesi útbúgving, skrivar setur.fo.