34 ár og nýggjur leiðari á Hotel Skálavík

- Tú kanst ikki vera bestur í øllum, og roynir tú tað, endar tú bara sum miðal, sigur Ólavur Thorsteinsson.

 

 

Fyri stívliga hálvum øðrum mánaði síðan fekk Hotel Skálavík nýggjan leiðara. Maðurin, sum er 34 ára gamal, er Ólavur Thorsteinsson. Nýggi hotelleiðarin vísir á, at enn er hann so nýggjur í starvinum, men hann heldur avgjørt, at nógv spennandi hendir í Sandoynni í løtuni.

- Her eru nógvar kreativar kreftir, og vit hava eitt gott samstarv við Visit Sandoy, sum hevur nógv góð hugskot. Umframt at vit eru í Skálavík, er tað eisini gevandi fyri økið, at her er ein lutfalsliga nýggj og øðrvísi kafé á Mølini.

Ólavur Thorsteinsson sigur, at Hotel Skálavík vil samstarva við allar partar í Sandoynni, tí tað ræður jú um, sum hann sjálvur tekur til, at alt gongur uppí eina hægri eind – øllum økinum til frama.

- Vit eru eitt hotell og tað, at ein kafé er á Mølini í Skálavík, er avgjørt bara gott. Jú, fleiri leita í Sandoynna og til Skálavíkar, tess meira virksemi verður skapt. Tú kanst ikki vera bestur í øllum, og roynir tú tað, endar tú bara sum miðal, sum hann tekur til.

##med2##

Hotelleiðarin sigur, at tey, sum starvast í tænastuni á Hotel Skálavík, vilja vera við til at lyfta Sandoynna á Føroyakortið, og tá Ólavur Thorsteinsson hyggur í hagtøl fyri vitjandi á hotellinum, sæst týðiliga, at tey eru mong, sum bæði eina ferð, tvær ferðir og tríggjar ferðir hava vitjað aftur á Hotel Skálavík.

- Tað eru nógvar familjur kring um í Føroyum, sum dáma væl at koma higar, og í fleiri førum síggja vit, at talan er um pør við børnum. Tað er heldur ikki so sjáldan, at bæði abbar og ommur eisini eru við á ferðini, sigur nýggi hotelleiðarin á Hotel Skálavík.