Slitið er eitt vónbrot

Møguleikin fyri semju um makrelin hevur ongantíð verið so góður sum nú.

Skotski fiskimálaráðharrin, Richard Lockhead, er sera vónsvikin av, at tað ikki eydnaðist strandarlondunum at semjast um eitt makrelbýti í ár. Heimasíðan Fishnewseu.com endurgevur ráðharran fyri at siga, at møguleikin fyri semju hevur ongantíð verið størri enn hesaferð í Edinburgh, og at óvissan hjá vinnuni gerst bara størri og størri. Richard Lockhead sigur, at tað áliggur øllum pørtunum at finna eina semju sum skjótast.

 

Tað verða neyvan gjørdar fleiri royndir at finna eina semju um makrelbýtið í ár, og partarnir fara tískil at áseta sær sjálvum kvotu. Noreg og ES gera tó eina roynd afturat at royna at finna eina sínámillum semju.

 

Heimasíðan hjá ES umrøður eisini makreltrætuna í dag. Sagt verður, at samveldið legði fram eitt býtisuppskot, sum føroyingar og íslendingar høvdu góðkent, men sum norðmenn vrakaðu. Nevndin leggur afturat, at møguleikin fyri semju hevur ongantíð verið so góður sum nú, og at tað tí er eitt stórt vónbrot, at tað ikki eydnaðist.

ES-nevndin sigur, at í samráðingunum við Noregi verður dentur lagdur á at halda fiskiskapin innan fyri tað fiskifrøðiliga tilmælið, og nevndin mælir føroyingum og íslendingum til at gera tað sama fyri at tryggja, at makrelstovnurin er burðardyggur.