Óbroytt kvota á Flemish Kap

Ein ávís niðurgongd hevur verið, men framvegis verður roknað við, at toskastovnurin við Flemish Kap er væl fyri. Hinvegin verður framvegis eingin rækjufiskiskapur

NAFO, sum er millumtjóða fiskiveiðifelagsskapur fyri útnyrðingspartin av Norðuratlantshavinum, hevði í vikuni sín 36. Ársfund. Fundurin varð hildin í Vigo í Spania.

 

Á fundinum kom fram, at seinastu kanningarnar hava víst eina ávísa niðurgongd í toskastovninum á Flemish Kap. Stovnurin verður tó framvegis mettur at vera væl fyri. Somikið væl fyri, at toskakvotan verður á mest sum sama støði komandi ár, sum hon hevur verið í ár. Heildarkvotan í 2015 verður 13.795 tons, og av hesum eiga Føroyar 3.083 tons – svarandi til 22,35%.

 

Umframt toskakvotuna, hava Føroyar kvotu av svartkalva og kongafiski í NAFO økinum. Føroyska kvotan av svartkalva og kongafiski í 2015 verður ávikavist 199 tons og 69 tons.

 

Hartil varð avgerð tikin um, at banna beinleiðis fiskiskapi eftir rækjum í NAFO-øki 3L, og er hetta galdandi fyri bæði kanadiskt og altjóða sjóøki. Støðan í rækjustovninum á Grand Bank hevur verið sera vánalig seinastu árini, og longu undanfarna ár mælti vísindanevndin til ongan fiskiskap. Ein avmarkaður fiskiskapur varð loyvdur í 2014, men negativa gongdin í stovninum tykist tó halda fram.

 

Umboðið fyri DFG gjørdi á fundinum vart við, at hesin fiskiskapur hevur stóran týdning fyri Føroyar og talan tí er um ein smeit fyri føroysku rækjuvinnuna. Umboðið legði afturat, at Føroyar framvegis mótmæla rækjubýtinum í Grand Bank. Mótmælið er grundað á søguligu veiðuna hjá Føroyum.

 

Í NAFO luttaka Føroyar og Grønland saman undir heitinum Denmark in respect of Faroe Islands and Greenland.

 

Elin Mortensen úr Uttanríkistænastuni var sendileiðari í føroysku sendinevndini, ið eisini taldi umboð úr Fiskimálaráðnum, VØRN og Føroya Reiðarafelag.