Eyðvør skorað fyrsta málið í Spania

Eyðvør Klakstein gjørdi søguligt mál í sponskum fótbólti um vikuskiftið

Í slakar tveir mánaðir hevur Eyðvør Klakstein roynt seg í felagnum CD Marino, ið spælir í næstbestu sponsku fótbóltsdeildini.

Eyðvør hevur verið fastur spælari á liðnum fyrstu fimm dystirnar, og um vikuskiftið skoraði hon sítt fyrsta mál fyri spanska felagið.

CD Marino spældi ímóti Anorga, og Eyðvør skoraði fyrra málið hjá CD Marino í 2-2 javnleikinum. Talan er um fyrsta málið hjá føroyskum fótbóltspælara í sponskum fótbólti.

CD Marino hevur spælt fýra javnleikir í fyrstu fimm dystunum og hevur tapt ein dyst. CD Marino hevur bert latið fýra mál inn hesar dystir, og tað er tað næstlægsta av øllum liðunum í deildini. Hinvegin hevur gingist trupult við at skora mál, eftir at liðið hevur mist toppskjúttan frá í fjør, og higartil hevur CD Marino bert skorað trý mál.

CD Marino liggur nummar 12 í næstubestu deildini, men stutt er millum liðini og bert trý stig eru hjá CD Marino upp til fimta pláss í deildini.

Næsta vikuskiftið skal CD Marino spæla ímóti Leioako, sum liggur nummar 13, og lítið er at ivast í, at Eyðvør og liðfelagarnir vóna at fáa fyrsta sigurin í hesum dystinum.